Goranboyda ev yandı, televizor partladı

BAKI, 15 fevral — Sputnik. Goranboyda ev yanaraq yararsız hala düşüb. Sputnik Azərbaycan xəbər verir ki, yanğın hadisəsi ötən gün rayonun Balakürd kəndində Nəsibə Verdiyevanın yaşadığı mənzildə olub. Həyat yoldaşından ayrılan qadın 3 övladı ilə birgə yanğın baş verən evdə yaşayıb. Övladlarına çörək pulu əldə etmək üçün Nəsibə Verdiyeva günəmuzd fəhlə kimi çalışır.

Yanğın hadisəsi də o işdə olan zaman qeydə alınıb. Qadının 3 uşağı evdə tək qalan zaman qəfil bir otaqlı mənzil alovlanıb. Həyacanlanan evin kiçik sakinləri özləri yanğını söndürməyə cəhd ediblər. Alov şiddətlənib ətrafa yayıldığından onlar qonşuları köməyə çağrıb.

İki qardaş, bacıları ilə evi tərk edən zaman isə televizor partlayıb. Hadisə yerinə çağırılan yanğınsöndürənlər alovu ram edə bilsələr də, ev əşyaları ilə birgə külə çevrilib.

Ev sahibəsi Nəsibə Verdiyevanı qonşular yanğından xəbərdar ediblər. Evə qayıdan qadın övladlarının sağ qalmasına sevinsə də, mənzilinin və əşyalarının külünü tapıb:

"Özüm Kəlbəcərdən məcburi köçkünəm, bu kənddə ailə qurmuşdum, 3 övladım var. Sonra yoldaşımdan ayrıldım, uşaqlarımla bu bir otaqlı evdə yaşıyırdım. Mənim mətbəxim də, qonaq, yataq otağım da, hamısı bu evdə idi. Uşaqları saxlamaq üçün gedib günəmuzd fəhləlik edirəm. Məcburam onları evdə qoyub getməyə. Bir də xəbər gəldi ki, evin yanıb. Qısaqapanmadan olub. Uşaqlar özləri palaz-paltarla söndürmək istəyiblər. Yanğın daha da artıb. Onlar çölə qaçanda televizor da partlayıb. Yaxşı ki, balalarıma nəsə olmayıb. Heç nə çıxara bilmədik, hamısı kül olub. Uşaqların kitablarına kimi yanıb. Sağ olsunlar, qonşular yemək, geyim veriblər bizə. Belə acınacaqlı durumda qalmışıq".

Çətin durumda qalan N.Verdiyeva Goranboy rayon İcra hakimiyyətinə müraciət edib. Qurumdan Sputnik Azərbaycan-a ailəyə kömək olacağı bildirilib:

“Balakürd kəndində baş verən yanğın zamanı mənzili yararsız hala düşən Nəsibə Verdiyeva və üç övladı müvəqqəti olaraq Goranboy rayon Xəstəxanasının keçmiş inzibati binasında, yerləşdiriləcək”.

Qeyd edək ki, yanğının hansı səbəbdən baş verməsi araşdırmalardan sonra məlum olacaq.