BAKI, 3 fevral — Sputnik. Ermənistan qonşuları Türkiyə və Azərbaycanla sülh içində yaşamalıdır. Sputnik Azərbaycan xəbər verir ki, bunu Ermənistan İctimai televiziyasının efirində "Vətəndaş Müqaviləsi" partiyasından Ermənistan prezidentliyinə namizəd Vahanq Xaçaturyan deyib.
O bildirib ki, qonşu ölkələrlə döyüşmək, münaqişə yaratmaq niyyətində deyil: "Mən hesab edirəm ki, qonşularla yalnız sülh şəraitində yaşamaq olar. Müxalifətin "Ermənistan sülhə məcbur edilir" tezisini də köhnəlmiş hesab edirəm. Biz çox güclü olsaq da, sülhə can atmalı, digərləri ilə münasibətdə bunu əsas tutmalıyıq".
Xaçaturyan Ermənistan-Türkiyə normallaşma prosesi haqqında da danışıb və bildirib ki, bu prosesə müsbət yanaşır: "Normallaşma prosesini davam etdirmək lazımdır. Bu, prosesin nəticəsi iqtisadi və siyasi əlaqələrə gətirib çıxaracaq. Əminəm ki, Türkiyənin də hər hansı ön şərti yoxdur. Ermənistan hakimiyyətinin və Türkiyə üzrə xüsusi nümayəndə Ruben Rubinyanın səsləndirdikləri bəyanatlara güvənirəm".
Xatırladaq ki, Türkiyə ilə Ermənistan arasında diplomatik münasibətlər hələ bərpa olunmayıb. 2021-ci il dekabrın 13-də Türkiyə xarici işlər naziri Mövlud Çavuşoğlu bəyan edib ki, münasibətlərin normallaşması üçün qarşılıqlı şəkildə nümayəndələr təyin olunacaq. Ermənistan XİN-i bu bəyanatı dəstəkləyib.
Daha sonra Ankara Türkiyənin ABŞ-dakı keçmiş səfiri Serdar Kılıcı İrəvanla münasibətlərin normallaşması üzrə xüsusi nümayəndə təyin edib. Ermənistan tərəfdən parlamentin sədr müavini Ruben Rubinyan təyin edilib.
Xüsusi nümayəndələrin ilk görüşü yanvarın 14-də Moskvada baş tutub.