BAKI, 27 noyabr — Sputnik. Bir əsr əvvəl Nəriman Nərimanovu Şəkiyə gətirən fayton hələ də orada qorunub saxlanır. Fayton hazırda Şəki Tarix Diyarşünaslıq Muzeyindədir. Muzeyin direktoru Aybəniz Qafarova Sputnik Azərbaycan-a bildirib ki, muzeydə 5 minə yaxın eksponat var ki, onlardan biri əsrdən artıq yaşı olan, Azərbaycan SSR Xalq Komissarları Sovetinin 1-ci Sədri Nərimanov Nərimanovu Şəkiyə gətirən faytondur.
"Nəriman Nərimanov savadsızlığın aradan qaldırılması məqsədilə müxtəlif yerlərdə təbliğatlar aparırdı. 1920-ci ilin oktyabr ayında da bu məqsədlə Şəkiyə gəlib. Şəkiyə isə Yevlaxdan bu faytonla səfər edib. Şəki Cümə məscidində də ictimai təbliğat aparıb", – deyə A.Qafarova əlavə edib.
Görkəmli dövlət xadimi Nəriman Nərimanov Şəkiyə səfəri barədə xatirələrini də bölüşüb. Xatirələri isə özünün kitabında qeyd edib.
Nəriman Nərimanov
© Sputnik / Ibrahim Hashimov
"Nəriman Nərimanov öz xatirələrində bildirib ki, Şəkiyə onu Abdulkərim adlı kişi gətirib. O yazır ki, məni faytonla şəkili Abdulkərim gətirdi. Onun şirin Şəki ləhcəsi ilə danışığı lətifələri elə ürəkaçan oldu ki, biz 6 saatlıq yolu sanki 6 dəqiqəyə gəldik", – deyə A.Qafarova əlavə edib.
Faytonu da sonradan muzeyə Abdulkərim adlı həmin Şəki sakini təhvil verib. Hazırda bu fayton muzeyin ən qiymətli eksponatları sırasında sərgilənir.