BAKI, 8 noyabr — Sputnik. Hərbi Hava Qüvvələrinin (HHQ) bir qrup hərbi qulluqçusunun, "Qartal" Dağçılıq İdman Klubunun alpinistlərinin və "Baku.TV"-nin əməkdaşlarının iştirakı ilə Vətən müharibəsinin ildönümünə həsr olunmuş "Dəmir yumruq" ekspedisiyası keçirilib.
Sputnik Azərbaycan Müdafiə Nazirliyinin məlumatına istinadən xəbər verir ki, əvvəlcə Şəhidlər xiyabanları ziyarət olunaraq şəhidlərimizin məzarları üzərinə gül dəstələri qoyulub və xatirələri ehtiramla yad edilib.
Polkovnik-leytenant Zal Nəbiyevin və klubun rəhbəri Rüfət Qocayevin başçılıq etdiyi bir qrup alpinistlər Quba rayonu ərazisindəki "Zəfər" zirvəsinə yürüş edib.
Dəniz səviyyəsindən 4301 metr yüksəklikdə Böyük Qafqaz sıra dağlarının Bazardüzü massivində yerləşən "Zəfər" zirvəsinə qalxan alpinistlər burada Azərbaycan Respublikasının Dövlət himnini ifa edib və Vətən müharibəsində həlak olmuş şəhidlərimizin əziz xatirəsini bir dəqiqəlik sükutla yad ediblər.