"Əlbətə ki, 11 yaşlı qız təhsilə qayıtmalıdır. Amma burada vacib, incə məqamları var. Biz onu da nəzərə almalıyıq ki, 11 yaşlı qızla bağlı məlumatlar təfərrüatı ilə geniş auditoriyaya çatdırılıb. Çox istərdik ki, mətbuat və sosial şəbəkələr belə hadisələr baş verdikdə hadisəni detallı şəkildə, xırdalıqlarına qədər açıqlamasınlar. Çünki, insanların sonrakı həyatı və bərpa prosesi çətinləşir. Həmin qızın təhsilə və əvvəlki yaşadıqları yerə qayıtması mümkünsüz olur. Ona görə də uyğun qərarların icrası üçün müəyyən vaxt tələb olunur. Biz elə etməliyik ki, onlar öz həyatlarını sərbəst, azad şəkildə davam etdirə bilsinlər".
"Əlbəttə ki, bunun sosial və iqtisadi əsasları üzərində də fikir mübadiləsi aparmaq olar. Amma bu, istənilən halda ailə, insan faciəsidir. Biz belə hadisələrin qarşısını almaq üçün səlahiyyətlərimiz çərçivəsində işlərimizi görürük. Konkret bu məsələyə gəldikdə isə təəssüf ki, 11 yaşlı qızın hamiləliyi uzun müddət gizli qalıb. Biz ictimaiyyətə müraciət etmişik ki, ətraflarında baş vermiş belə hadisələrə biganə qalmasınlar. Dövlət orqanlarına müvafiq məlumatı versinlər ki, biz belə hadisələrin pis nəticə olmamış qarşısını alaq. Burada isə biz fakt qarşısında qalmışıq. Belə olan halda da qurumların səlahiyyətlərinə uyğun vəzifələri var ki, o vəzifələrini yerinə yetirməlidirlər. Biz Komitə olaraq bu ailənin psixososial qiymətləndirməsini aparırıq. Bunun üçün bizim yerli Mərkəzlərin nümayəndələri və icra hakimiyyəti yanında fəaliyyət göstərən xüsusi komissiyalar var ki, onların nümayəndələrinin iştirakı ilə psixososial cəhətdən dəyərləndirilmə aparılır, təcavüzə məruz qalmış qızın və onunla bir evdə yaşayan ailə üzvülərinin reablitasiyası, bundan sonrakı həyatı üçün lazım olan qərarlar verilir".