BAKI, 5 oktyabr — Sputnik. Bakıda koronavirusa yoluxma səbəbindən bir məktəbdə siniflər distant təhsilə keçəcək. Bu barədə Bakı şəhəri 162 saylı məktəbin vatsap qrupunda valideynlər məlumat paylaşıb.
Valideynlərin Sputnik Azərbaycan-a verdikləri məlumata görə, məktəbin 8 ç sinif şagirdləri arasında koronavirusa yoluxma səbəbindən distant təhsilə keçəcəklər. Valideynlər bildirib ki, onlara bu barədə məktəbdən məlumat verilib.
Valideynlər onu da qeyd edib ki, sinifdə 40-a yaxın şagird var. 162 saylı məktəbdən Sputnik Azərbaycan-a bildirdilər ki, məktəbdə yalnız 8 ç sinifi üzrə şagirdlər arasında koronavirusa yoluxma qeydə alınıb:
"Yalnız Elnarə Məmmədovanın sinif rəhbəri olduğu sinifdə koronavirusa 3 şagird yoluxub. Bu, 8 ç sinifidir. Ona görə də, Elnarə müəllimənin sinfi distant təhsilə keçir. Digər siniflərdə isə dərslər ənənəvi qaydada davam edəcək".
Qeyd edək ki, son günlər məktəblərdə koronavirusa yoluxma barədə məlumatlar yayılıb. Bu barədə rəsmi statsitika hələki açıqlanmayıb.
Məlumat üçün bildirək ki, məktəblərdə sentyabrın 22-dən 1-4, 29-dan isə 5-11-ci siniflər üzrə ənənəvi tədrisə başlanılıb.