BAKI, 23 sentyabr — Sputnik. Polşa Prezidenti Andjey Duda Ağ Ev administrasiyasının problemləri haqqında danışarkən, indiki Amerika lideri Co Bayden və əvvəlki prezident Donald Trampın adlarını səhv salıb. Bu barədə "Onet" portalı xəbər verib.
Bir gün əvvəl Polşa prezidenti BMT Baş Assambleyasında iştirak etmək üçün Nyu-Yorka gəlib. Xarici jurnalistlərə verdiyi müsahibədə o, Varşava ilə Vaşinqton arasındakı əlaqələrdən danışıb, həmçinin amerikalı həmkarlarının qarşılaşdıqları çətinlikləri də qeyd edib.
"Hazırda Prezident Donald Tramp administrasiyasının bir çox problemləri var, məsələn, Əfqanıstandakı vəziyyətlə məşğul olmalıdır", - deyə Duda bildirib.
O, ABŞ və Polşa münasibətlərindəki bir az soyuqlaşmanı da izah etməyə çalışıb.
BMT Baş Assambleyasının 76-cı sessiyası sentyabrın 14-də Nyu-Yorkda başlayıb. Bu həftə, sessiya çərçivəsində dövlət və hökumət başçılarının iştirakı ilə ənənəvi yüksək səviyyəli görüşlər keçirilir.