BAKI, 21 sentyabr — Sputnik. Azərbaycanın Xalq artisti Yusif Eyvazov həyat yoldaşı, Rusiyanın Xalq artisti Anna Netrebkonun Kreml sarayının səhnəsində keçirilən yubileyində ona sürpriz edib.
Sputnik Azərbaycan xəbər verir ki, tədbirdə Yusif Eyvazov Rusiyanın Xalq artisti Valeriya ilə "Любовь побеждает всё" ("Sevgi hər şeyə qalib gəlir"-red.) adlı mahnını duet oxuyub və onu səbəbkara həsr edib.
Duet zalda əyləşən tamaşaçıların çoxunu kövrəldib. Qeyd edək ki, mahnının musiqisi Maksim Fadeyevə, sözləri isə Natalya Kasimtsevaya məxsusdur.
Məlumat üçün bildirək ki, Yusif Eyvazov Milan Beynəlxalq Opera müğənniləri müsabiqəsinin Qran Pri mükafatçısıdır. 1996-cı ildə Bakı Musiqi Akademiyasına daxil olub, daha sonra təhsilini davam etdirmək məqsədi ilə 1998-ci ildə İtaliyaya, Milana gedib. Burada Franko Korelli, Luçano Pavarotti, Maqda Oliveri, Plaçido Dominqodan ustad dərsləri alıb. Yusif Eyvazov Kapriolo, Montanyana və Milan vokal müsabiqələrinin finalçısı və qalibi olub.
Həmçinin oxuyun: