BAKI, 8 sentyabr — Sputnik. Azərbaycan Respublikasının Qida Təhlükəsizliyi Agentliyi (AQTA) ölkə ərazisində qanunvericiliyin tələbləri çərçivəsində qida təhlükəsizliyinin təmin edilməsi, istehlakçı hüquqlarının müdafiəsi sahəsində tədbirləri davam etdirir.
"Sputnik Azərbaycan" xəbər saytında "Bakıda mağazada Kəlbəcərin "İstisu"yu satılır" başlığı altında yayılan məlumat əsasında dərhal araşdırmalara başlanılıb və Agentlik əməkdaşları tərəfindən Bakı şəhəri, Sabunçu rayonu, Zabrat ştq, Babək küçəsi 14 ünvanında fəaliyyət göstərən, fiziki şəxs İbrahimov Firdovsi Nəbi oğluna məxsus "Ayxan" ərzaq satışı müəssisəsində plandankənar yoxlama keçirilib. Yoxlama zamanı normativ texniki sənədlərin tələblərinə əməl edilmədən, heç bir sahibkarlıq fəaliyyəti ilə məşğul olmayan Nağızadə Anar adlı şəxs tərəfindən suların Kəlbəcərdən gətirilərək kustar üsulla qablaşdırılıb satışa təqdim edildiyi müəyyən edilib. Məhsullardan götürülən nümunələr Azərbaycan Qida Təhlükəsizliyi İnstitutunun müvafiq laboratoriyalarında müayinələrə cəlb olunub. Aşkar edilmiş nöqsanlarla bağlı qanunvericiliyin tələblərinə uyğun müvafiq tədbirlər görülüb, məhsullar satışdan çıxarılıb.
Bakıda marketdə satılan "İstisu"
© Sputnik / Stringer
AQTA əhalinin sağlamlığının qorunması və təhlükəsiz qida məhsulları ilə təmin edilməsi istiqamətində ardıcıl tədbirlərini davam etdirir və istehlakçı hüquqlarının pozulmasına yönəlmiş qanunsuz halların qarşısı bundan sonra da qətiyyətlə alınacaqdır.
Həmçinin oxuyun: