Leyla Abdullayeva, Sputnik Azərbaycan
BAKI, 1 mart - Sputnik. Xızıda ölümlə nəticələnən yol qəzası olub. Hadisə bu gün səhər saatlarında Bakı- Quba yolunun 64-cü km-də, Xızı rayonundan keçən hissəsində baş verib.
Sputnik Azərbaycan-ın verdiyi məlumata görə Rusiya vətəndaşı, Dağıstan Respublikasının Kayakənd rayon sakini, 32 yaşlı Ruslan Maqomedkamiloviç Kairovun idarə etdiyi "Scania-113" markalı yük avtomobili Bakıdan Quba istiqamətdə gedərkən eyni istiqamətdə olan, Xızı rayonunun Şuraabad qəsəbə sakini, 60 yaşlı Həsənəli Səfər oğlu Səfərovun idarə etdiyi "Belarus" markalı traktorla toqquşub.
Nəticədə Xızı rayon suvarma sistemləri idarəsinün sürücüsü olan Həsənəli Səfərov aldığı xəsarətlərdən yerindəcə ölüb. Traktorda olan sərnişin, Şuraabad qəsəbə sakini, 52 yaşlı Bəhlul Gülməmməd oğlu Həsənov isə xəsarət alıb.
Yaralı dərhal Sumqayıt şəhər təcili tibbi yardım xəstəxanasına çatdırılıb. Faktla bağlı Baş Dövlət Yol Polisi İdarəsinin istintaq və təhqiqat şöbəsində cinayət işi açılıb.