Bakıda Azərbaycan Atçılıq Federasiyası tərəfindən təşkil edilən çövkən oyunu üzrə Prezident Kuboku keçirilib. Dekabrın 15-də başlayan yarışda səkkiz komanda iştirak edib. Bu gün, dekabrın 24-də isə final qarşılaşmaları baş tutub. Üçüncü yer uğrunda "Buta Golden" və "Sərhədçi 2-Dilbaz" komandaları mübarizə aparıblar. Oyun "Buta Golden" komandasının 3:0 hesablı qələbəsi ilə başa çatıb.
Birinci yer uğrunda oyun isə daha maraqlı və gərgin keçib. "Sərhədçi" və "Polad" komandaları arasında keçən oyunun əsas vaxtında qalib müəyyənləşməyib. Əlavə olunmuş vaxtda "Sərhədçi" 4:3 hesabı ilə qalib gələrək birinci yerə layiq görülüb.
Qeyd edək ki, çövkən oyunu 2013-cü ildə UNESCO-nun Qeyri-maddi mədəni irsin Reprezentativ Siyahısına daxil edilib.