BAKI, 22 dekabr — Sputnik. Azərbaycanlı rejissor Elmar Bayramovun "Let me run" ("İzn ver, qaçım") qısametrajlı filmi Londonda keçirilən "Fighting Spirit Film" beynəlxalq kinofestivalında "Ən yaxşı xarici film" mükafatına layiq görülüb.
Sputnik Azərbaycan xəbər verir ki, ABŞ-ın Pensilvaniya ştatında yaşayan E.Bayramovun rejissoru və ssenari müəllifi olduğu ekran əsəri fiziki qüsurlu Orxan adlı gəncin həyat hekayəsindən bəhs edir. Əsərin qəhrəmanı bütün çətinliklərə baxmayaraq, məqsədinə nail olmaq üçün maneələri dəf edir.
Filmdə əsas rolu Tural Manafov ifa edir. Filmin prodüserləri Könül Kəngərli, Klara Brotons Merkadal, Alan Qoldberq və Zeke Ramazan Geisdir.
Qeyd edək ki, indiyə qədər "İzn ver, qaçım" qısametrajlı filmi Los-Anceles, Nyu-York və Torontoda keçirilən beynəlxlaq kinofestivallarda da müxtəlif nominasiyalar üzrə qalib olub.