Zülfiyyə Quluyeva, Sputnik Azərbaycan
BAKI, 9 sentyabr — Sputnik. Bakıda nikaha daxil olmaq istəyən şəxslərin icbari tibbi müayinədən keçməsi üçün reaktiv tapılmır. Bu barədə Sputnik Azərbaycan-a vətəndaşlar şikayət ediblər. Vətəndaş Əfruzə Ağayeva Sputnik Azərbaycan-a açıqlamasında bildirib ki, nikaha daxil olmaq üçün Nəsimi rayonu üzrə 20 saylı poliklinikaya müraciət edib.
Sputnik Azərbaycan problemi araşdırmaq üçün Nəsimi rayon 20 saylı poliklinika ilə əlaqə saxlayıb. Poliklinikadan Sputnik Azərbaycan-a bildirilib ki, nikaha görə tibbi müayinə üçün analiz reaktiv olmadığı üçün aparılmır: "Bizdə reaktiv yoxdur, bunu nazirlik səviyyəsində də bilirlər. Ona görə də ərazidə yaşayan vətəndaşlardan qan analizi götürə bilmirik. Vətəndaş "ASAN xidmət" mərkəzinə müraciət etsin".
Qeyd edək ki, poliklinikalarda qan analizinin nəticəsi daha tez verildiyi üçün nikaha təcili daxil olmaq istəyən şəxslər əsasən qeydiyyatda olduqları ünvan üzrə poliklinikalara üz tuturlar. Poliklinikalar isə reaktiv olmadığı üçün analiz götürməkdən imtina edirlər. "ASAN xidmət" mərkəzlərində isə bu müayinənin cavabı iki həftədən tez verilmir.
Səhiyyə Nazirliyindən isə sorğumuza cavab veriləcəyi bildirilib.