Əhalinin həyat və sağlamlığının qorunmasını, dövlət qurumlarının və həyat təminatı obyektlərinin fasiləsiz işini, habelə yaranmış vəziyyətdə iqtisadi subyektlərin zəruri həddə fəaliyyətini təmin etmək məqsədi ilə Nazirlər Kabineti yanında Operativ Qərargah 5 aprel 2020-ci il saat 00:00-dan 20 aprel 2020-ci il saat 00:00-dək ölkədə hərəkət məhdudiyyətləri tətbiq edib.
Bu qaydaların tətbiqindən sonra bir qrup şəxslərin xidməti vəsiqələri və ya iş yeri barədə arayış əsasında, digər qrup şəxslər barəsində məlumatlar işəgötürən tərəfindən elektron imzadan istifadə edilməklə “icaze.e-gov.az” portalına daxil edildikdən sonra küçəyə çıxmasına icazə verilir.
Bütün digər şəxslərin yaşayış yerini tərk etmələrinə aşağıdakı hallarda yol verilir:
təxirəsalınmaz tibbi zərurətlə və hər hansı bir qrafik üzrə müalicə almaqla əlaqədar;
ərzaq və digər gündəlik tələbat mallarının, habelə dərman vasitələrinin alınması, bank və poçt xidmətlərindən istifadə edilməsi zərurəti ilə əlaqədar;
yaxın qohumunun dəfnində iştirakla əlaqədar.
Bu məhdudiyyətlərə riayət edənlər də var, onları pozanlar da. Sputnik Azərbaycan qeyd olunan qayda qüvvəyə mindikdən sonra paytaxtdakı durumu lentə köçürüb.