BAKI, 18 fevral — Sputnik. Azərbaycan millisinin hücumçusu Ramil Şeydayevin "Sabah"a keçidi rəsmiləşib.
Sputnik Azərbaycan klubun saytına istinadən xəbər verir ki, 23 yaşlı futbolçu ilə bu mövsümün sonuna kimi müqavilə imzalanıb. Şeydayev "Sabah"da 99 nömrəli forma ilə çıxış edəcək.
Ramil futbolçu karyerasına Rusiyanın "Zenit" klubunda başlayıb. O, daha sonra Sankt-Peterburq təmsilçisinin əsas komandasının, Rusiyanın "Rubin", "Krılya Sovetov", "Dinamo" (Moskva), Türkiyənin "Trabzonspor", Slovakiyanın "Jilina" klublarının və ölkəmizdə "Qarabağ"ın uğurları üçün çalışıb.
Şeydayev Rusiya millisinin aşağı yaş qruplarının, həmçinin bu ölkənin 21 yaşadək futbolçulardan ibarət komandasının üzvü olub. 2016-cı ildən Azərbaycan yığmasının şərəfini qoruyan Ramil, əsas millimizdə keçirdiyi 26 oyunda 4 qola imza atıb.