BAKI, 16 fevral — Sputnik. "Yuventus"un əfsanəvi qapıçısı Canluici Buffon avtoqraf istəyən asiyalı azarkeşlə koronavirusla bağlı zarafat edib.
Sputnik Azərbaycan İtaliya mətbuatına istinadən xəbər verir ki, bu hadisə ölkə kubokunun yarımfinalında "Milan"la oyundan sonra baş verib. Buffon imza atarkən azarkeşdən "Mən səni izləyirəm. Korona? Sən Uhandansan?" deyə gülərək soruşub.
Buffonun bu zarafatı o qədər də xoş qarşılanmayıb. Sosial şəbəkədə bir çoxları qapıçının asiyalı şəxsə münasibətdə zarafatının yersiz olduğunu bildiriblər.
Xatırladaq ki, "Milan" doğma meydanda "Yuventus"la qarşılaşıb. Görüş 1:1 hesabı ilə başa çatıb. Meydan sahiblərindən oyunun 61-ci dəqiqəsində Rebiç, qonaq komanda da isə qarşılaşmaya əlavə olunmuş vaxtda Ronaldo fərqlənə bilib. Bu komandalar arasında cavab oyunu martın 4-ü keçiriləcək.