BAKI, 12 fevral — Sputnik. Bakı metrosunun "28 May" stansiyasının çıxışı - Cəfər Cabbarlının heykəlinin ətrafı hasara alınıb. Ərazidə təmir işləri aparılır. Bu barədə Sputnik Azərbaycan-a "Bakı Metropoliteni" Qapalı Səhmdar Cəmiyyətinin mətbuat katibi Bəxtiyar Məmmədov deyib. O bildirib ki, ərazidə görülən işlər metropoliten əməkdaşları tərəfindən aparılır: "Ərazinin hasara alınmasında məqsəd tunellərdə havalandırmanın daha da yaxşılaşdırılmasıdır. Ərazidə işlərin aparılması üçün Bakı Şəhər İcra Hakimiyyətindən müvafiq icazə alınıb".
"İşlər yekunlaşdıqdan sonra ərazinin estetik görünüşünə görə orada havalandırma köşkü qoyulacaq", - deyə B.Məmmədov əlavə edib.