BAKI, 3 yanvar — Sputnik. Bakı-Moskva reysi ilə uçan təyyarə Volqoqradda təcili eniş edib.
Sputnik Azərbaycan RİA Novosti-yə istinadən bildirir ki, buna səbəb sərnişinlərdən birinin özünü pis hiss etməsi olub.
Aeroportun mətbuat xidmətinin rəhbəri Anastasiya Qolodova bildirir ki, yerli vaxtla 7:44-də 1853 saylı reyslə uçan "Aeroflot"a məxsus təyyarə Volqoqrada enib.
"Sərnişinlərdən biri özünü pis hiss edib. Onu xəstəxanaya aparıblar", - Qolodova bildirib.
Onun sözlərinə görə, göyərtəsində 85 sərnişinin olduğu təyyarə 1 saatdan sonra təyinatı üzrə yola salınıb.