BAKI, 5 sentyabr — Sputnik. Əmlak Məsələləri Dövlət Komitəsi jurnalistlərin ikinci binasına kupçaların verilməsi ilə bağlı məlumat yayıb.
Komitədən Sputnik Azərbaycan-a verilən məlumatda bildirilir ki, Prezident İlham Əliyevin "Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında" 2013-cü il 22 iyul tarixli Sərəncamı ilə jurnalistlər üçün inşa edilmiş və onların mülkiyyətinə verilmiş ikinci binada yerləşən mənzillərə dair Çıxarışlar Əmlak Məsələləri Dövlət Komitəsi tərəfindən yaxın günlərdə səyyar mobil qeydiyyat xidməti çərçivəsində həmin binanın həyətində media nümayəndələrinə təqdim ediləcək.
Xatırladaq ki, dünən jurnalistlər ikinci binaya kupçaların verilməməsi barədə Prezidentə müraciət ediblər. Jurnalistlər üçün ikinci binanın açılış mərasimi 20 iyul 2017-ci il tarixində baş tutub. Açılış mərasimində Prezident İlham Əliyev də iştirak edib. O, həmçinin jurnalistlərin mənzil şəraitinin yaxşılaşdırılması məqsədilə 3-cü binanın təməlini qoyub.