BAKI, 25 iyul — Sputnik. "Hopper" portalı "Instagram"da ən bahalı reklama sahib idmançıların reytinqini dərc edib.
Sputnik Azərbaycan "Dailymail" nəşrinə istinadən xəbər verir ki, siyahının ilk pilləsində Portuqaliya millisinin və "Yuventus"un ulduz futbolçusu Kriştianu Ronaldo qərarlaşıb. Onun hesabında reklam postu paylaşmaq 975 min dollar dəyərindədir.
İkinci pillədə 722 min dollarla braziliyalı Neymar, üçüncü pillədə 648 min dollarla argentinalı forvard Lionel Messi qərarlaşıb.
İlk onluqda İngiltərə millisinin sabiq yarımmüdafiəçisi Devid Bekhem (357 min dollar, 4-cü yer), Braziliya millisinin sabiq oyunçusu Ronaldinyo (256 min dollar, 6-cı), Uels yığmasının və "Real"ın hücumçusu Qaret Beyl (218 min dollar, 7-ci), "Los Anceles Qelaksi"nin hücumçusu Zlatan İbrahimoviç (200 min dollar, 8 və 9-cu), Uruqvay millisinin və "Barselona"nın futbolçusu Luis Suares (184 min dollar, 10-cu) yer alıb.