BAKI, 16 iyul — Sputnik. "Türkiyəyə gətirilən "S-400" zenit-raket kompleksləri tamamilə bizim nəzarətimizdə olacaq". Sputnik Türkiyə xəbər verir ki, bu sözləri Şimali Makedoniyada səfərdə olan Mövlud Çavuşoğlu bildirib.
"Aldığımız "S-400" sistemi "F-35" də daxil olmaqla NATO sistemlərinə heç bir təhdid yaratmır. Tamamilə bizim nəzarətimizdə olacaq bir sistemdir. Lazımsız gərginlik yaratmağa ehtiyac yoxdur. Onsuz da yekunlaşmış razılaşmadır. Artıq onların gətirilmə prosesi başlayıb", - deyə Çavuşoğlu qeyd edib.
Xatırladaq ki, ötən həftə "S-400" zenit-raket komplekslərinin birinci partiyası artıq Türkiyəyə çatdırılıb.
ABŞ Türkiyənin "S-400" zenit-raket komplekslərini almasına mane olmağa çalışıb. Vaşinqton artıq Ankaranı sanksiyalarla və "F-35" qırıcısına dair müqaviləyə xitam verəcəyi ilə təhdid edib.
Xatırladaq ki, iyunun 28-də Birləşmiş Ştatlar Senatı 5-ci nəsil "F-35" qırıcı təyyarələrinin Türkiyəyə tədarükünün qadağan olunmasına dair qərar qəbul edib. Bu barədə Senatın 2020-ci il üçün təsdiqlədiyi müdafiə büdcə layihəsində qeyd olunur.
Məlumatda qeyd edilir ki, büdcə layihəsinin 1236-cı bəndində "F-35"lərin Türkiyəyə tədarükünün məhdudlaşdırılması göstərilir.
Bundan əlavə, qanun layihəsində "F-35" təyyarələrinin texniki xidməti ilə bağlı olan avadanlıqların, intellektual mülkiyyət və texniki məlumatların Türkiyə Respublikası ərazisinə ötürülməsi də qadağan edilir.