BAKI, 13 iyul — Sputnik. "Fitch" beynəlxalq reytinq agentliyi Türkiyənin kredit reytinqini endirib.
Sputnik Azərbaycan "Bloomberg"ə istinadla xəbər verir ki, agentlik Türkiyənin uzunmüddətli defolt reytinqini "BB" səviyyəsindən "BB-" səviyyəsinə salıb.
Verilən açıqlamada Türkiyənin xarici valyutada uzunmüddətli kredit reytinqinin "BB"dən "BB-" səviyyəsinə endirildiyi, proqnozunun "mənfi" olduğu bildirilib. Kredit reytinqinin aşağı salınmasında səbəb kimi Mərkəzi Bank ilə bağlı son proseslər, gözlənilən inkişafın gecikməsi, Türkiyənin Rusiyadan "S-400" almasından sonra ABŞ sanksiyaları ilə üzləşəcəyi riski göstərilib.
Qeyd edək ki, bundan öncə "Fitch" agentliyi Türkiyənin xarici valyutada uzunmüddətli kredit reytinqini "BB" səviyyəsində təsdiqləyib. Agentlik qərarını Türkiyə iqtisadiyyatının xarici maliyyə mənbələrindən asılılığı və qeyri-sabitliyi, ölkənin valyuta ehtiyatlarının az, xarici borcunun çox olması, yüksək qiymət artımı, siyasi və iqtisadi risklərlə izah etmişdi.