İntihara cəhd edən ata və övladından xəbər var

Nigar Məhərrəm, Sputnik Azərbaycan

BAKI, 28 iyun — Sputnik. Ötən gün gecə saatlarında Mingəçevir Şəhər Mərkəzi Xəstəxanasında arzuolunmaz olay baş verib. Belə ki, Mingəçevirdə orta yaşlı kişi övladını xəstəxanaya gətirdikdən sonra öz üzərinə benzin tökərək intihara cəhd edib.

Sputnik Azərbaycan-a İcbari Tibbi Sığorta Agentliyindən verilən məlumata görə, uşağın atası, 1990-cı il təvəllüdlü şəxs, övladının vəziyyətinə görə keçirdiyi stress səbəbindən iyunun 27-də xəstəxananın qarşısında üzərinə benzin tökərək özünü yandırıb.

Təcili yardım xidmətinin baş həkimi Səhiyyə Nazirliyinin hərəkətinə mat qalıb

14 İyun 2019, 16:01

Xəstəxana personalı tərəfindən hadisəyə müdaxilə edilib və xəstəyə dərhal ilkin tibbi yardım göstərilib. Ağır dərəcəli bədən xəsarəti alan xəstə reanimasiyaya alınıb. O, baş, boyun, gövdə, aşağı ətraflar və budun arxa hissəsində təxmini olaraq 70% termiki yanıq xəsarəti alıb, vəziyyəti çox ağır qiymətləndirilir. Xəstənin vəziyyəti ilə bağlı tibb müəssisəsinə Respublika Yanıq Mərkəzindən konsultasiya üçün mütəxəssis dəvət olunub.

İntihara cəhd edən şəxsin övladı, 2015-ci il təvəllüdlü uşaq iyunun 27-də 38 dərəcə qızdırma ilə valideynləri tərəfindən Mingəçevir Şəhər Mərkəzi Xəstəxanasının Təcili Tibbi Yardım Şöbəsinə gətirilib. Xəstəyə ilkin tibbi yardım göstərildikdən sonra yuxarı tənəffüs yollarının kəskin infeksiyası diaqnozu ilə uşaq şöbəsinə (stasionara) yerləşdirilib. Uşağın vəziyyəti orta qiymətləndirilir və hazırda müalicəsi davam edir.