BAKI, 20 iyun — Sputnik. ABŞ Müdafiə Nazirliyinin (Pentaqon) sözçüsü Erik Pahon Moskvanın S-400 ixtilafından istifadə edərək ABŞ ilə Türkiyə arasındakı münasibətləri pozmağa çalışdığını iddia edib.
Sputnk Azərbaycan "Haberler"ə istinadla xəbər verir ki, Pahon Moskvanın birinci hədəfinin NATO-da boşluqlar yaratmaq olduğunu, amma bunun baş verməyəcəyini dilə gətirib.
Pentaqon sözçüsü bildirib ki, ABŞ Türkiyəyə strateji müttəfiq olaraq çox dəyər verir. Birgə təlimləri artırmaq üçün çalışmaya davam edirik. Moskva isə bu dərin münasibətlərə zərər verməyə çalışır.
İki ölkə arasında əlaqələrin bundan sonra da davam edəcəyini söyləyən Pahon Türkiyə ilə 70 ildir müttəfiq olduqlarını söyləyib: "Çətin dövrlərdən keçdik. Təbii ki, Türkiyənin S-400-dən imtina etməsini, Patriotlar almasını istəyirik". Pahon bu məsələdə Türkiyə səlahiyyətliləri ilə müzakirələrin davam etdiyini söyləyib.
Qeyd edək ki, Birləşmiş Ştatlar Türkiyəyə "S-400" zenit-raketləri ilə bağlı ultimatum verib. Bildirilir ki, Ankara iki həftə ərzində Moskva ilə sövdələşməni pozmalı və Amerikanın "Patriot" raket əleyhinə müdafiə sistemlərini almalıdır. Əks təqdirdə ABŞ Türkiyəni "F-35" proqramından çıxaracaq.
Amerika hökuməti Türkiyəni vəd olunmuş yüzlərlə qırıcıdan məhrum etməklə yanaşı, ona qarşı sanksiyalar tətbiq etməklə də hədələyib. Eyni zamanda bu, NATO tərəfindən də "reaksiyaya" səbəb ola bilər.
"Bir ölkə digərinə necə hərəkət etməsinə dair göstəriş verə bilməz. Birləşmiş Ştatlar bu cür davranışdan imtina etməlidir. Hamı bundan narahatdır. Bu məsələ nə qədər uzağa gedə bilər? Əgər ABŞ bizə qarşı addımlar atarsa, onda biz də eyni şeyi etməyə məcbur olacağıq. Təbii ki, heç kim buna səssiz qalmayacaq", - deyə Türkiyə Xarici İşlər naziri Mövlud Çavuşoğlu cavabında bildirib.