BAKI, 1 iyun — Sputnik. ABŞ senatorları "Şimal Axını 2" qaz borusunun tikintisində istifadə olunan gəmilərə sığorta xidmətlərini göstərən fiziki və hüquqi şəxslərə qarşı ən azı beş növ sanksiyanın tətbiq olunmasını təklif ediblər. Sputnik Azərbaycan Ria Novosti-yə istinadən xəbər verir ki, sözügedən təkliflərin qeyd olunduğu qanun layihəsi mayın 14-də Konqresə təqdim olunub, lakin sənədin tam mətni bugün dərc olunub.
Təklif olunan sanksiyalara həmçinin aşağıdakılar daxildir:
- ixrac lisenziyalarının verilməsinə qadağa;
- il ərzində ümumi həcmi 10 milyon dollardan artıq kreditlərin alınmasına qadağa;
- ABŞ dövlət borcları və ya federal maliyyə vasitələri üzrə əməliyyatlara qadağa;
- ABŞ yurisdiksiyası zonasında ödənişlərin aparılmasına və əmlak əməliyyatlarına qadağa
- ABŞ ərazisinə daxil olmaq qadağası və Rusiya boru xətlərinin tikintisində istifadə olunan gəmilərin satışı, kirayəsi və təmin edilməsində iştirak edən şəxslərin ABŞ yurisdiksiyasında aktivlərinin dondurulması.
Qanun layihəsinin müəllifləri senatorlar Ted Kruz, Cin Şaxin, Con Barraso və Tom Kottondur.
Foreign Policy jurnalı güman edir ki, iki tikinti şirkəti bu sanksiyaların hədəfinə tuş gələ bilər. Bunlar İsveçrənin Allseas və İtaliyanın Saipem şirkətləridir.
Sanksiyaların "Türk Axını" layihəsinin dəniz hissəsinin də reallaşmasına təsir edə biləcəyi bildirilir.
"Şimal Axını 2" layihəsi çərçivəsində Baltik dənizinin dibi ilə Rusiya və Almaniya arasında qaz kəmərinin tikintisi nəzərdə tutulub. Qaz kəmərinin gücü ildə 55 milyard kubmetr qaz təşkil etməlidir.
Layihə Almaniya və Avstriya tərəfindən dəstəklənir. "Şimal Axını 2" layihəsini Norveç də dəstəkləyir. Bu ölkənin hökuməti layihənin podratçılarından biri olan Kvaerner şirkətində 30 faiz pay sahibidir.