İlham Əhmədov, Sputnik Azərbaycan
BAKI, 3 noyabr — Sputnik. Göyçay rayonunda təşkil edilən 13-cü nar festivalı rəngarəngliyi, milli-adət ənənələrimizin nümayişi və Azərbaycanda yetişən nar sortlarının əhəmiyyətinin təbliği baxımından diqqəti cəlb edib.
Sputnik Azərbaycan-ın bölgə muxbiri xəbər verir ki, bayram tədbirinin iştirakçıları Heydər Əliyev prospekti boyu bir-birini əvəz edən səhnəcikləri, ədəbi-bədii kompozisiyaları,milli folklor nümunələrini,gənc rəssamların və məktəblilərin əl işlərini, yarış və müsabiqələri maraqla seyr ediblər, nardan hazırlanmış çeşidli təamların dadına baxıblar. Müxtəlif emal müəssisələrinin satış-sərgiləri də diqqət mərkəzində olub. Minlərlə rayon sakininin, xarici ölkələrdə və Bakı şəhərində yaşayan göyçaylı ziyalıların, turistlərin, diplomatik korpus nümayəndələrinin, hökumət nümayəndələrinin və millət vəkillərinin qatıldığı festivalda iştirakçıları milli geyimli qızlar nar şirələri ilə qarşılayıblar. Cəngi rəqsi qonaqları xoş duyğulara kökləyib. Məktəblilər Azərbaycan, rus və ingilis dilində qonaqlara xoş arzularını bildiriblər. Gülövşə, şirin vələs rəmzi nar paltarlarında olan gənclərin və nar şahzadəsinin çıxışları diqqəti cəlb edib. Bayram şənliyində nar meyvəsinin mədəni-iqtisadi potensialının rəmzinə çevrilən çoxsaylı sərgilər, kompozisiyalar, folklor numunələri nümayiş etdirilib. Qonaqlara nar çiçəkli geyimlərdə olan qızlar yerli müəssisələrin istehsalı olan nar suyunu, şərbətini və bayram nişanların; paylayıblar. Meydana daxil olan Nar şahzadəsi festival iştirakçılarını salamlayıb. Rayonun 25 kəndində narçılıqla məşğul olan insanların yetişdirdiyi məhsullardan hazırlanmış məhsulların sərgisinə baxış keçirilib.
Qonaqlar aş, nardança, kətə, yuxa, nar şərab, nar şirəsi kimi təamların dadına baxıblar. Xalçaçılıq məhsullarının, ağac üzərində oyma işlərinin, nar mövzusunda satış-sərgilərin təşkili rəngarəngliyi daha da artırıb.
Bayram tədbirində Göyçay rayon icra hakimiyyətinin başçısı Mehdi Səlimzadə bildirib ki, bu festival Göyçayda narçılığın inkişafına təkan verir, dünyada təbliğinə müsbət təsir göstərir. Təkcə son üç ildə rayonda 1500 hektardan artıq yeni nar bağı salınıb, yeni istehsal müəssisələri fəaliyyətə başlayıb. Ötən il Göyçayda 40 min ton nar tədarük olunub. Bu il isə meyvə bağlarından 42 min tona yaxın nar məhsulunun yığılması gözlənilir. Bu isə əhalinin büdcəsinə əlavə olaraq 40 milyon manat vəsait gətirəcək. Vurğulanlb ki, narın şirəsindən və qabığından 20-yə yaxın xəstəliyin müalicəsində istifadə olunur. Bu meyvədən nar şərabı, nar şirəsi, nardança, mürəbbə və digər qida məhsulları hazırlanır ki, insan orqanizmi üçün çox böyük əhəmiyyət daşıyır.
Festivalda ən böyük nar müsabiqəsinin, nar atmaq, nar sıxmaq yarışlarının qalibləri mükafatlandırılıb. Tədbrdəki ən böyük narın çəkisi 1kq 300 qram olub. Xalqımızın qədim və zəngin adət-ənənəsinin, təbii sərvətlərinin nümayişinə çevrilən Nar bayramı xarici ölkə vətəndaşlarının da ürəyincə olub. Onlar gələcəkdə də nar bayramında iştirak etmək arzusunda olduqlarını söyləyiblər. Göyçayda nar bayramının birinci günü tanınmış incəsənət ustalarının təqdim etdikləri konsert proqramı ilə davam etdirilib.