BAKI, 6 avqust — Sputnik. Son iki sutka ərzində respublikanın daxili işlər orqanlarının əməkdaşları 220 cinayət faktını qeydə alıb. Bu barədə Sputnik Azərbaycan-a Daxili İşlər Nazirliyinin mətbuat xidmətindən məlumat verilib.
Qeydə alınan cinayətlərin 48-i "isti izlər"lə açılıb. Əvvəlki dövrlərdən bağlı qalmış 5 cinayətin açılması təmin olunub. Axtarışda olduğuna görə ümumilikdə 26 nəfər, o cümlədən mülki-hüquqi öhdəliklərin icrasından yayındığına görə 2 nəfər, borclu şəxs qismində axtarışda olan 8 nəfər saxlanılaraq aidiyyəti üzrə təhvil verilib.
Respublikanın avtomobil yollarında 11 yol-nəqliyyat hadisəsi baş verib. Nəticədə 4 nəfər ölüb, 25 nəfər isə müxtəlif dərəcəli bədən xəsarətləri alıb.
Daxili işlər orqanları əməkdaşlarının həyata keçirdikləri əməliyyat-axtarış tədbirləri nəticəsində cinayət törətməkdə şübhəli bilinən 44 nəfər saxlanılıb. Narkotik maddələrin qanunsuz dövriyyəsi ilə bağlı 21 cinayət faktı, qanunsuz odlu silah saxlama ilə bağlı isə 1 fakt müəyyən edilib.