BAKI, 15 iyul — Sputnik. Bu gün Rusiyada keçirilən futbol üzrə dünya çempionatının finalıdır. Sputnik Azərbaycan xəbər verir ki, final matçında Fransa və Xorvatiya yığmaları qarşılaşacaqlar.
Hər iki komanda oynadıqları qrupu lider olaraq başa vurub. Fransızlar C qrupunda 2 qələbə, 1 heç-heçə ilə 7 xal toplayıblar. Xorvatlar isə D qrupunda hər üç oyunda qələbə çalaraq, 9 xal yığa biliblər.
Fransa 1/8 finalda Argentinanı, 1/4 finalda Uruqvayı, yarımfinalda isə Belçikanı məğlub edib. Xorvatlar isə 1/8 finalda Danimarkaya, 1/4 finalda Rusiyaya, yarımfinalda isə İngiltərəyə qalib gəliblər.
Fransa tarixi ərzində bir dəfə dünya çempionu olub. 1998-ci ildə Zinəddin Zidan, Tyeri Anri və komandanın hazırki baş məşqçisi Didye Deşamın lideri olduğu Fransa dünya çempionu titulunu qazanıb. 2006-cı ildə isə Fransa finala çıxsa da, penaltilər seriyasında İtaliyaya uduzub.
Xorvatiya isə nəinki çempion olmayıb, hətta bu il tarixində ilk dəfə finala çıxıb. Komandanın ən yaxşı göstəricisi Fransanın çempion olduğu 1998-ci ildə 3-cü yer olub.
Final matçı Bakı vaxtı ilə saat 19:00-da başlayacaq.