BAKI, 26 iyun — Sputnik. Rusiyada keçirilən futbol üzrə XXI dünya çempionatında C qrupunda III turun oyunları başa çatıb. Sputnik Azərbaycan-ın məlumatına görə, son oyunda Danimarka və Fransa üz-üzə gəlib, paralel matçda isə Avstraliya ilə Peru qarşılaşıb.
C qrupunun lideri olan Fransa Danimarka ilə qolsuz bərabərliyə razılaşıb. Avstraliya isə gözlənilmədən 0:2 hesabı ilə Peruya uduzub. Bu görüşdən sonra 7 xal yığan Fransa ilə xallarının sayını 5-ə çatdıran Danimarka 1/8 finala keçiblər. Çempionatda iki məğlubiyyətdən sonra ilk qələbəsini qazanaraq 3 xal yığan Peru və 3 oyunda cəmi 1 xal toplayan Avstraliya evlərinə dönürlər.
Saat 22.00-da isə D qrupunun təmsilçiləri yaşıl meydançaya çıxacaqlar. Sankt-Peterburqda Nigeriya-Argentina, Rostovda isə Xorvatiya-İslandiya oyunları start götürəcək.
İki turdan sonra 6 xal toplamış Xorvatiya D qrupunun lideridir. Nigeriya 3 xal toplayıb, Argentina və İslandiyanın iki oyundan sonra 1 xalları var.
Bu qruplarda ilk iki yeri tutan yığmalar 1/8 finalda bir-biriləri ilə qarşılaşacaqlar.