BAKI, 25 iyun — Sputnik. Rusiyada keçirilən futbol üzrə dünya çempionatında III turun oyunlarına start verilir. Sputnik Azərbaycan-ın məlumatına görə, bu gün A və B qruplarında oyunlar keçiriləcək.
A qrupunda meydan sahibləri Rusiya yığması Uruqvayla, Misir isə Səudiyyə Ərəbistanı ilə qarşılaşacaq. Ərəb ölkələri arasındakı oyun statistika xarakteri daşıyacaq. Çünki bu komandalar ilk iki turda hər iki oyunda uduzaraq növbəti mərhələyə çıxmaq şansını itiriblər.
Artıq 1/8 finalda yerlərini təmin edən Rusiya və Uruqvay isə qrup liderliyi uğrunda mübarizə aparacaqlar.
Hər iki oyun eyni zamanda — Bakı vaxtı ilə saat 18:00-da başlayacaq.
B qrupunda isə İran Portuqaliya, İspaniya isə Mərakeşlə görüşəcək. Bu qrupda turnir 2 oyundan sonra heç bir xal yığa bilməmiş Mərakeş üçün bitib. Digər 3 komanda növbəti mərhələ şansını saxlayır. Hazırda İspaniya və Portuqaliyanın 4, İranın isə 3 xalı var.
Hər iki oyun Bakı vaxtı ilə saat 22:00-da başlayacaq.