BAKI, 6 iyun — Sputnik. Argentina milli komandası İsraillə yoldaşlıq oyunu keçirməkdən imtina edib. Sputnik Azərbaycan Türkiyə mediasına istinadən xəbər verir ki, buna səbəb oyundan əvvəl fələstinlilər tərəfindən qaldırılan etirazlar olub.
Argentina milli komandası iyunun 9-na planlaşdırılan yoldaşlıq oyununu, ümumiyyətlə ləğv etməyə qərar verib. Onlar həm də Qüdsə getməyi təhlükəsizlik baxımından əlverişli hesab etməyiblər.
Qeyd edək ki, Qüdsdə keçirilməsi planlaşdırılan yoldaşlıq oyunu fələstinlilərin ciddi etirazına səbəb olmuşdu. Hətta Fələstin Futbol Federasiyasının prezidenti Cabrail Racub yerli sakinləri Messinin şəkillərini və formalarını yandırmağa çağırmışdı.
Bundan başqa, bir qrup fələstinli Argentina millisinin Barselonada yerləşən bazasının qarşısında etiraz aksiyası da keçirmişdi.