BAKI, 1 iyun — Sputnik. Muzey Mərkəzində Azərbaycan Respublikası Mədəniyyət Nazirliyi və Latviyanın Azərbaycandakı səfirliyinin təşkilatçılığı ilə latviyalı rəssam Datse Ştrausanın "Canlı miras" adlı fərdi sərgisi təşkil olunub.
Sərgi Azərbaycan Xalq Cümhuriyyətinin və Latviya Respublikasının 100 illik yubileylərinə həsr edilib. Sərgidə rəssam Datse Ştrausanın Azərbaycanın Qarabağ cins atlarına həsr etdiyi rəsm əsərləri nümayiş olunub.
Sputnik Azərbaycan xəbər edir ki, sərginin açılışında Latviyanın Azərbaycandakı səfiri Yuris Maklakovs iştirak edib. Səfir çıxışı zamanı qeyd edib ki, sərgidə iki ildir Azərbaycanda yaşayan rəssam Daçe Ştrausaya məxsus 29 əsər nümayiş olunur.
Latviyalı səfir, həmçinin bildirib ki, bu il hər iki ölkədə əlamətdar hadisənin 100 illiyi qeyd olunur. Məhz bu sərgi də həmin əlamətdar günlərə həsr olunub: “Mən düşünürəm ki, bu sərginin keçirilməsi də əlamətdar hadisədir. Qarabağ atlarının tablolarından ibarət sərginin təşəbbüsü üçün Daçe Strausaya təşəkkür edirəm".
Sərgidə iştirak edən Mədəniyyət və Turizm Nazirliyinin beynəlxalq əməkdaşlıq şöbəsinin müdiri Vasif Eyvazzadə isə çıxışında Qarabağ atlarının vətəninin bu gün işğal altında olduğunu xüsusilə qeyd edib. Bildirib ki, lakin Azərbaycan bu mirası qoruyur: “2013-cü ildə atların iştirakı ilə keçirilən Çövkən oyunu YUNESKO-nun qeyri-maddi mədəni irs siyahısına daxil edilib. Bu sərgi də çox maraqlıdır və Qarabağ atlarının təbliğində geniş yer alır".
Sərgidə Qarabağ atları üzrə mütəxəssis Yaşar Quluzadə də iştirak edib. O, çıxışı zamanı sərgini təşkil edənlərə təşəkkür edib və bildirib ki, Qarabağ atları ilə bağlı nə qədər çox məlumat olsa, Azərbaycanın incilərindən sayılan Qarabağ atlarını bir o qədər çox tanıtmaq olar: "Bu atlar xüsusiyyətinə görə çox fərqlənir. Biz çalışmalıyıq ki, onları qoruyaq və gələcək nəsillərə ötürək. Daçe Strausaya da təşəkkür edərəm. Qarabağ atlarına xüsusi sevgisinin olmasına çox sevinirəm".
Tədbirin sonunda rəssam Daçe Strausaya da fikirlərini, düşüncələrini bölüşüb. O, Qarabağ atlarına xüsusi sevgisinin olduğunu bildirib: "Bu atlar gözəlliyi, xarakteri ilə digərlərindən fərqlənir. Qarabağ atları məni çox cəlb edib və böyük həvəslə rəsmlərini işləmişəm".
Qeyd edək ki, sərgi iyunun 4-nə kimi davam edəcək.