Leyla Abdullayeva, Sputnik Azərbaycan
BAKI, 12 may — Sputnik. İkiqat qətlin üstü açılıb. Hadisə Sabirabad rayonunda baş verib. Məlumat Sputnik Azərbaycan-ın bölgə müxbirinə DİN-in mətbuat xidmətinin Şirvan regional qrupundan verilib.
Sabirabad Rayon Polis Şöbəsinin və rayon prakrorluğunun əməkdaşlarının keçirdikləri əməliyyat-axtarış tədbirləri nəticəsində bu gün rayon sakinləri Teymur Sadıqovu və Kamran Yaqubovu qətlə yetirməkdə şübhəli bilinən rayon sakini, 42 yaşlı Firqət Əliyev saxlanılıb.
F.Əliyev Sabirabad rayon ərazisində Teymur Sadıqovu bıçaqla qətlə yetirib, sonra Saatlı rayonuna gedərək K.Yaqubovu da öldürüb. O, hadisə yerindən uzaqlaşarkən keçirilən istintaq-axtarış tədbirləri nəticəsində saxlanılaraq Sabirabad RPŞ-yə gətirilib.
Dindirilmə zamanı F.Əliyev törətdiyi cinayətləri etiraf edib. Qətlləri törədərkən istifadə etdiyi bıçaq cinayətkardan maddi sübut kimi götürülüb.
Faktla bağlı Sabirabad və Saatlı Rayon Prokurorluğunda araşdırma aparılır.