BAKI, 27 mart — Sputnik. "Keçmiş kəşfiyyatçı Sergey Skripalın zəhərlənməsinə səbəb olan "A-234" kimyəvi sinir qazı Amerikada təkmilləşmiş formada istehsal olunur". Sputnik Azərbaycan Rusiya mətbuatına istinadən xəbər verir ki, bu barədə Rusiyanın Müdafiə Nazirliyi (MN) məlumat yayıb.
"Amerika Birləşmiş Ştatları "A-234" kimyəvi maddəsini daha da təkmilləşdirir. Əlimizdə bunu sübut edəcək ciddi faktlar var" — MN-in Kimya və Analitik Nəzarət Laboratoriyasının rəhbəri İqor Rıbalçenko deyib.
Onun sözlərinə görə, bu maddə, hətta ABŞ ordusunun inventarında da var.
Qeyd edək ki, rusiyalı keçmiş kəşfiyyatçı Sergey Skripal və qızının İngiltərədə kimyəvi sinir qazı ilə zəhərlənməsindən sonra Böyük Britaniya ilə Rusiya arasında diplomatik qalmaqal başlayıb. Rəsmi London sui-qəsdin arxasında Kremlin durduğunu iddia etsə də Moskva bu iddianı rədd edir.
Onu da xatırladaq ki, sözügedən hadisə ilə əlaqədar dünən Avropa Birliyinin 16 ölkəsi, eləcə də ABŞ, Kanada, Norveç, Albaniya və Ukrayna rusiyalı diplomatların ölkədən çıxarılacağını elan edib. Rəsmi Moskva isə həmin ölkələrə qarşı adekvat addımların atılacağını bəyan edib.