Tarixdə bu gün: 20 mart – FOTO
© Sputnik / Elnur Salayev
Abunə olmaq
Bu gün dünyada və ölkədə müxtəlif illərdə hansı hadisələr baş verib - Sputnik Azərbaycan-ın icmalında oxuyun
BAKI, 20 mart — Sputnik. Martın 20-də bir çox dünya şöhrətli aktyorlar, elm adamları, idmançılar, yazıçılar və siyasətçilər dünyaya gəliblər. Bu gündə tarixə düşən hadisələr də baş verib.
Martın 20-də kimlər dünyaya gəlib?
Hüseynqulu Sarabski (1879-1945) - Azərbaycan SSR xalq artisti, opera müğənnisi, bəstəkar, aktyor və rejissordur. O, "Leyli və Məcnun" operasında Məcnun rolunun ilk ifaçısı olaraq bu rolda təxminən 400 dəfə çıxış edib.
Cəfər Cabbarlı (1899-1934) - Azərbaycan SSR əməkdar incəsənət xadimi, dramaturq və şairdir. Onun ən məşhur əsərləri "Aydın", "Oqtay Eloğlu", "Qız qalası", "Od gəlini"dir.
Aleksandr Qorodnitski (1933) - Sovet və Rusiya alimi, şairi, RF əməkdar elm xadimidir. O, Rusiyada müəllif mahnısı janrının banilərindən biridir.
Holli Hanter (1958) - ABŞ teatr və kino aktrisasıdır. O, "Oskar" mükafatının qalibidir. Aktrisa "Ceki", "Gölün zirvəsi", "Betmen Supermenə qarşı: Ədalət şəfəqi" və s. filmlərdə rol alıb.
Holli Hanter
© AFP 2023 / VALERIE MACON
Çester Benninqton (1976-2017) - ABŞ rok musiqiçisi və bəstəkarıdır. O, "Linkin Park", "Grey Daze", "Dead by Sunrise" və "Stone Temple Pilots" qruplarının vokalisti olub.
Chester Bennington
© MARCEL VAN HOORN / ANP / AFP
Ksavye Dolan (1989) - kanadalı aktyor və kinorejissordur. O, Kann kinofestivalında "Qran Pri" mükafatı laureatıdır. Aktyor "Anamı öldürdüm", "Xəyali sevgi", "Yaxşı qonşular", "Tom fermada" və s. filmlərdə rol alıb.
Xavier Dolan
© AFP 2023 / VALERY HACHE
Martın 20-də dünyada baş verən tarixi hadisələr
1792-ci ildə Fransa Milli Assambleyası gilyotinin (ölüm cəzasına məhkum olanların başını kəsmək üçün maşın) istifadəsinə icazə verib. Bir il sonra XVI Lüdovik gilyotinlə edam edilib. Uzun müddət edamlar yalnız ictimaiyyət qarşısında həyata keçirilib. Hökmdə fransız xalqının adına məhkumun ictimai yerdə başının kəsiləcəyi bildirilib.
1854-cü ildə ABŞ-da Respublikaçılar Partiyası yaradılıb.
1921-ci ildə ABŞ-ın Kanzas-Siti şəhərində Volt Disney tərəfindən qurulan "Newman Laughogram" animasiya studiyasından ilk cizgi filmi nümayiş olunub.
1956-cı ildə Tunis Fransadan ayrılaraq öz müstəqilliyini elan edib.
2012-ci ildən BMT Baş Assambleyası tərəfindən təsis edilmiş Beynəlxalq Xoşbəxtlik Günü qeyd edilir.
Hər il martın 20 və 21-də Azərbaycanda yazın gəlişi və təbiətin yenilənməsi ilə Novruz bayramı qeyd olunur. 2009-cu ildə UNESCO tərəfindən qeyri-maddi mədəni irs siyahısına daxil edilib.
