BAKI, 2 aprel — Sputnik. Rusiya Prezidentinin mətbuat katibi Dmitri Peskov aprelin 7-si Rusiya Prezidenti Vladimir Putin və Ermənistanın Baş naziri Nikol Paşinyan arasında danışıqların keçiriləcəyini təsdiqləyib. Bu barədə Sputnik Azərbaycan "RİA Novosti"-yə istinadən xəbər verir.
"İlk növbədə, təbii ki, görüş zamanı Qarabağda üçtərəfli razılaşma və üçtərəfli sənədin reallaşdırılması müzakirə olunacaq", - deyə Peskov qeyd edib.
Peskovun sözlərinə görə, tərəflər Ermənistanda keçiriləcək seçkiləri və Cənubi Qafqazda nəqliyyat infrastrukturlarının açılması məsələlərini müzakirə edəcəklər.
Qeyd edək ki, daha əvvəl Ermənistan Baş nazirinin mətbuat katibi Mane Qevorkyan bildirib ki, Ermənistan Baş naziri Nikol Paşinyan aprelin 7-si Rusiya Prezidenti Vladimir Putinlə Moskvada görüşəcək. O bildirib ki, bununla bağlı Ermənistan hökumətinin rəhbəri aprelin 2-dən özünütəcrid rejimində işləyir.
Qevorkyan bildirib ki, şəxsi görüşlər, qəbul və ictimai tədbirlərdən başqa Ermənistan Baş naziri adi qrafikdə işləyir.
Sonuncu dəfə Paşinyan və Putin Moskvada yanvarın 11-i görüşüblər.
Qeyd edək ki, Azərbaycan, Rusiya və Ermənistan liderlərinin Qarabağ üzrə üçtərəfli bəyanatı 2020-ci il noyabrın 10-da imzalanıb. Bəyanata əsasən, Dağlıq Qarabağ münaqişə zonasında 2020-ci il noyabrın 10-u saat 00:00-dan etibarən bütün hərbi əməliyyatların dayandırılması və tam atəşkəs barədə razılıq əldə olunub.
Bəyanata görə, Ağdam rayonu 2020-ci il noyabrın 20-də, Kəlbəcər rayonu noyabrın 25-də (ilkin olaraq noyabrın 15-i nəzərdə tutulurdu), Laçın rayonu isə dekabrın 1-də Azərbaycana qaytarılıb. Bununla yanaşı, təmas xətti və Laçın dəhlizi boyunca Rusiya Federasiyasının sülhməramlı kontingenti yerləşdirilir. Paralel olaraq Ermənistan silahlı qüvvələri işğal olunmuş ərazilərdən çıxarılmalıdır.
Tərəflərin razılığına əsasən, yaxın üç ildə Laçın dəhlizi üzrə Xankəndi ilə Ermənistanın əlaqəsini təmin edəcək yeni hərəkət marşrutunun tikintisinin planı müəyyən olunacaq. Daxili məcburi köçkünlər və qaçqınlar BMT-nin Qaçqınların işləri üzrə Ali Komissarının nəzarəti altında Dağlıq Qarabağın və ətraf rayonların ərazisinə qayıdacaqlar. İqtisadi və nəqliyyat əlaqələrinin bərpa olunacağı gözlənilir. Ermənistan Respublikası vətəndaşların, nəqliyyat vasitələrinin və yüklərin hər iki tərəfə maneəsiz hərəkətinin təşkil olunması məqsədi ilə Azərbaycan Respublikasının qərb rayonları ilə Naxçıvan Muxtar Respublikası arasında nəqliyyat əlaqəsini təmin edəcək.
