BAKI, 31 yanvar - Sputnik. Fransada polis orgiya iştirakçılarını koronavirusa qarşı mübarizə tədbirlərinə riayət etmədiklərinə görə cərimələyib.
Sputnik Azərbaycan bildirir ki, bu barədə Daily Mail yazır.
Orgiya yanvarın 29-da Paris yaxınlığında yerləşən anbarda təşkil olunub. Əxlaqsız ziyafət barədə yerli bölməyə şikayətlər daxil olub, polislər tədbirin qızğın çağında özlərini yetiriblər.
İştirakçılar polisə müqavimət göstərməyiblər. Komendant saatını pozduqlarına, eləcə də sosial məsafəni gözləmədiklərinə və maska taxmadıqlarına görə tədbirin üç təşkilatçısı həbs olunub, 100-ə yaxın adam isə cərimələnib. Əlüstü keçirilən məhkəmədə hakimlər işıq və səs avadanlıqlarının, eləcə də alkoqolun müsadirə olunmasına da qərar veriblər.
Bundan əvvəl Yeni il gecəsində isə komendant saatını pozduğuna görə Fransada 6,6 min nəfər cərimələnmişdi.
