BAKI, 21 mart — Sputnik. Türkiyədə koronavirus pandemiyası əleyhinə görülən tədbirlərə daha biri əlavə edilib.
Sputnik Azərbaycan-ın məlumatına görə, Türkiyənin Daxili İşlər Nazirliyi bu barədə yeni qərar qəbul edib.
Qərara əsasən, sabahdan yaşı 65-dən yuxarı olan vətəndaşların və xroniki xəstəliyi olan şəxslərin evdən çölə çıxmalarına, park və bağça kimi açıq yerlərdə gəzmələrinə məhdudiyyət qoyulur.
"Bazar günü saat 00:00-dan başlayaraq yaşı 65-dən yuxarı olan şəxslərə, həmçinin xroniki xəstələrə küçəyə çıxmaq, parklarda, bağlarda və bu cür açıq meydançalarda gəzmək qadağa qoyulur", - ölkənin Daxili İşlər Nazirliyinin xəbərində deyilir.
Ümumdünya Səhiyyə Təşkilatı martın 11-də koronavirusu pandemiya elan edib. Dünyada artıq 234 mindən çox insan COVİD-19 infeksiyasına yoluxub, 10 min nəfərdən çox insan virusun qurbanı olub.
