BAKI, 7 iyul — Sputnik. Sloveniyada ABŞ prezidenti Donald Trampın həyat yoldaşının taxta heykəli təqdim olunub. Sputnik Azərbaycan "Match" qalereyasının rəsmi saytına istinadən xəbər verir ki, heykəl birinci xanımın doğulduğu şəhərin yaxınlığında Sava çayının sahilində quraşdırılıb.
Melaniya Tramp heykəldə inaqurasiya zamanı olduğu geyimdə təsvir olunub. Heykəl “məsum incəsənət janrı”nda yaradılsa da, onun üz və bədən quruluşunda kobudluq hiss olunur.
Sosial şəbəkələrdə birmənalı qarşılanmayan sənət əsəri müxtəlif fikirlərə səbəb olub. Şəbəkə istifadəçiləri heykəli Amerika liderinin həyat yoldaşına deyil, "The Smurfs" cizgi filminin qəhrəmanına oxşadaraq onu çirkin, biabırçı və qorxunc adlandırıblar.
Qeyd edək ki, amerikalı rəssam Bred Daun heykəllə bağlı açıqlamasında təkcə ideyanın ona məxsus olduğunu, işin icrasının isə başqa şəxs tərəfindən aparıldığını bildirib.
