BAKI, 19 iyun — Sputnik. Tehran və Vaşinqton arasında müharibə baş verməyəcək.
Sputnik Azərbaycan xəbər verir ki, bu barədə RİA Novosti-yə İranın Ali Milli Təhlükəsizlik Şurasının katibi Əli Şamxani deyib.
"İran və ABŞ arasında müharibə baş verməyəcək, çünki bunun üçün səbəb yoxdur", - deyə o bildirib.
İyunun 17-si ABŞ müdafiə nazirliyi bildirib ki, Vaşinqton İrandan gələn "təhlükə"yə cavab olaraq Yaxın Şərqə əlavə qüvvələr göndərməyə hazırlaşır. Vaşinqtonun fikrincə, iyunun 13-ü Oman körfəzində "Front Altair" və "Kokuka Courageous" neft tankerlərinə edilmiş hücumlarda Tehranın əli var.
Pentaqonda bildiriblər ki, ABŞ Yaxın Şərqə əlavə olaraq 1000 hərbçi göndərmək niyyətindədir.
Çərşənbə axşamı Dövlət Katibi Mayk Pompeo ABŞ prezidentinin İranla müharibə istəmədiyini, lakin Vaşinqtonun regionda öz maraqlarının müdafiəsini vacib hesab etdiyini deyib.
