BAKI, 2 mart — Sputnik. Nobel mükafatı laureatı akademik Jores Alfyorov 89 yaşında dünyasını dəyişib. Sputnik Azərbaycan Rusiya mətbuatına istinadla xəbər verir ki, alimin kəskin ürək-ağciyər çatışmazlığından öldüyü müəyyən edilib.
Bu barədə Rusiya Elmlər Akademiyası xəstəxanasının baş həkimi Oleq Çuqunov məlumat verib. Onun sözlərinə görə, akademik Moskva vaxtı ilə martın 1-də 23.40-da dünyasını dəyişib.
Qeyd edək ki, alim ötən ilin noyabr ayında insult diaqnozu şübhəsi ilə xəstəxanaya düşmüşdü.
Xatırladaq ki, Alfyorov sovet və rus fiziki, Nobel mükafatı laureatıdır. O 2000-ci ildə yarımkeçirici texnologiya sahəsində inkişafı üçün Fizika üzrə Nobel mükafatı alıb.
Qeyd edək ki, Jores Alfyorov 2004-cü ildən Azərbaycan Elmlər Akademiyasının üzvüdür.
