BAKI, 16 sen — Sputnik. Fransanın Strasburq şəhərində Avropa ölkələri parlament sədrlərinin toplantısı keçirilib. Toplantıda Türkiyəni Böyük Məclisinin sədri İsmayıl Kahraman təmsil edib.
Sputnik "Akşam" qəzetinə istinadən xəbər verir ki, Avropa Şurası Parlament Assambleyasının sədri Pedro Aqramunt toplantının açılış nitqində Türkiyədəki 15 iyul dövlət çevrilişi cəhdinə toxunub.
"Türkiyədə çox faciəli hadisələrə şahid olduq. Demokratiyanı yox etməyə yönələn çevriliş cəhdi qarşısında vətəndaşlar misilsiz şücaət nümunəsi göstərdilər" — Aqramunt bildirib.
Daha sonra söz alan Türkiyə Böyük Millət Məclisinin sədri İsmayıl Kahraman isə avropalı müttəfiqlərindən gileylənib. O, çevriliş cəhdinə qarşı şərtsiz qınama gözlədiklərini, lakin gözləntilərinin özünü doğrultmadığını vurğulayıb.
Çevriliş cəhdindən sonra keçirilən mitinqlərə qarşı bəzi Avropa ölkələrinin mövqelərini də tənqid edən Kahraman deyib: "Bəzi Avropa şəhərlərində dövlət çevrilişi cəhdinə etiraz edərək demokratiyanın müdafiəsi məqsədilə küçələrə Türkiyənin bayraqları ilə çıxan insanlar barəsində araşdırılma aparılması və ya onlara pul cərimələrinin tətbiq edilməsi hansı demokratik dəyərlərlə izah edilə bilər?".
