BAKI, 9 iyul – Sputnik. Barəsində məhkəmə işi davam edən Braziliya prezidenti Dilma Rusef könüllü istefa verməyəcəyini açıqlayıb.
Sputnik RIA Novosti-yə istinadən xəbər verir ki, D.Rusef, San-Pauluda feminist hərəkatının nümayəndələri ilə görüşü zamanı xuntaya təslim olmayacağını deyib: "Mən təslim olmayacağam, mənim şərəf və ləyaqətim var".
Dilma Rusef may ayında Braziliya Senatının qərarı ilə 180 gün müddətinə vəzifəsindən kənarlaşdırılıb və onun vəzifəsini müvəqqəti olaraq vitse-prezident Mişel Temer icra edərək yeni kabinet formalaşdırıb. Gələn ay senatda Braziliya prezidentinin yekun impiçmenti ilə əlaqədar məsələyə baxılması nəzərdə tutulur.
