Yeni il ərəfəsində evdar xanımlar bayram süfrəsi üçün yeni və qeyri-adi yeməklər hazırlamağa çalışırlar. Bu məqsədlə sobada duzun içində bişirilən yumşaq, ətirli balıq hazırlamaq olar.
Bu yeməyin necə bişirildiyini Sputnik Azərbaycan-a Bakıdakı "Soloxa" Ukrayna mətbəxi restoranının qurucusu və icraçı direktoru Lidiya Şestak-Əliyeva nümayiş etdirib.
İstənilən balıq növü duzda basdırılaraq sobada bişiriləndə nəticə gözəl alınır. Balıq, necə deyərlər, ağızda əriyir. Düzdür, bu yeməyi bişirmək üçün çoxlu duza ehtiyacınız olacaq, ancaq sonda ortaya çıxan nəticə buna dəyər! Duz balığın ətrafında bərk təbəqə əmələ gətirir ki, bu da onun şirəsini, ətrini və dadını saxlamasına kömək edir. Balıq özü isə çox duzlu olmur, yalnız lazımı qədər duzu özünə çəkir.
Lidiya onu da bildirdi ki, zövqə uyğun istənilən balıq növünü seçə bilərsiniz, əsas odur, qılçığı az olsun.
