BAKI, 1 iyul — Sputnik. Hazırda Bakıda keçiriləcək AVRO-2020 1/4 final oyununa satışa çıxarılmış biletlərin üçdə ikisi alınıb. Bu barədə Sputnik Azərbaycan-a Azərbaycan Futbol Federasiyaları Assosiasiyasından (AFFA) xəbər verilib.
Danimarka və Çexiya milli komandaları arasında AVRO-2020 dörddəbir final oyunu şənbə günü, iyulun 3-də Bakı Olimpiya stadionunda keçiriləcək.
AFFA-dan verilən məlumata gprə, hazırda bu oyuna təqribən 21 min bilet satılıb.
Bakı Olimpiya stadionu 68 min nəfər tamaşaçı tutur. 50%-lik məhdudiyyət və televiziya yayımları üçün ayrılan yerlər nəzərə alınmaqla, tamaşaçılar üçün 31 min yer qalır.
Qeyd etmək lazımdır ki, Avropa çempionatının Bakıda keçirilən oyunları arasında ən çox tamaşaçı toplamış oyun hələ ki, qrup mərhələsinin ikinci turunda keçirilmiş Türkiyə-Uels oyunu olub (0:2).
Həmin oyunda 19,7 min nəfər tamaşaçı qeydə alınıb. Üçüncü turda keçirilən Türkiyə-İsveçrə oyununda (1:3) stadionda 17,1 min azarkeş olub. Ən az tamaşaçı isə ilk turda Uels-İsveçrə (1:1) oyununda qeydə alınıb – 8,7 min.
Beləliklə, AVRO-2020 "A" qrupunda Bakı Olimpiya stadionunda keçirilən üç oyunda ümumilikdə 45,6 min tamaşaçı olub.
AVRO-2020 Bakı oyunları
Bakı Olimpiya stadionunda ümumilikdə dörd oyunun keçirilməsi nəzərdə tutulub. "A" qrupunda iyunun 12-də İsveçrə-Uels (1:1), iyunun 16-da Türkiyə-Uels (0:2), iyunun 20-də İsveçrə-Türkiyə (3:1) oyunları artıq keçirilib. Bundan əlavə iyulun 3-də isə burada AVRO-2020 1/4 final oyunlarından birinin keçirilməsi də nəzərdə tutulub.
AVRO-2020-nin Bakıdakı təşkilat komitəsi ilə AR Nazirlər Kabineti yanında Operativ Qərargah Bakı Olimpiya Stadionunun Avropa çempionatı oyunları zamanı tribunaların 50%-i həcmində azarkeş qəbul edəcəyinə zəmanət vermişdilər. Bakıda AVRO-2020-nin matçlarının iştirakçı ölkələrindən olan, bilet almış və ya UEFA-nın akkreditasiyasına malik əcnəbi azarkeşlər isə Heydər Əliyev aeroportunda sadələşdirilmiş qaydada viza ala bilərlər.
Eləcə də oxuyun:
-
Bakıda AVRO-2020 1/4 final oyunu şərəfinə "Düyməcik" və "Qar kraliça" nümayiş olunacaq
-
Danimarkalıların və çexlərin Bakı oyunundan narazılığı: əsaslandırılmış səbəblər, yoxsa...
-
Praqadan Bakıya çex azarkeşləri gətirəcək reys ləğv edildi
