BAKI, 4 oktyabr - Sputnik. Azərbaycan şahmatçısı Teymur Rəcəbov Rusiyanın Xantı-Mansiysk şəhərindəki Dünya Kubokunun finalında altıncı "tay-breyk" görüşünü keçirib.
Sputnik Azərbaycan xəbər verir ki, azərbaycanlı qrossmeyster çinli Din Lijenlə bu dəfə ağ fiqurlarla üz-üzə gəlib.
Altıncı "tay-breyk" Rəcəbovun qələbəsi ilə bitib və şahmatçımız Dünya Kubokunun qalibi olub - 6:4. Teymur Rəcəbov Dünya Kubokunun sahibi olan ilk şahmatçımızdır.
Qeyd edək ki, final mərhələsində ümumi hesab bərabər olduğu üçün (2:2) "tay-breyk" oynanılıb.
Turnirdə üçüncü yeri fransız Maksim Vaşye-Laqrav tutub.
Yarışın mükafat fondu 1,6 milyon dollardır. Qalib 110 min dollar, finalçı isə 80 min dollar qazanıb.
