BAKI, 24 iyul — Sputnik. Azərbaycanı (+100 kq çəki dərəcəsində) beynəlxalq yarışlarda təmsil edən 6 qat Avropa, 2 qat dünya və Paralimpiya oyunlarının çempionu İlham Zəkiyev Sputnik-ə Rusiyanın yüngül atletika komandasının Rio-de-Janeyro Yay Olimpiadasında iştirakdan kənarlaşdırılması ilə bağlı münasibət bildirib.
“İdmanda sağlam rəqabət olmalıdır. Dopinq ümumiyyətlə idmanda bəyənilmir. Cəza verilibsə demək belə də olmalıdır. Dopinqdən istifadə edən idmançı mütləq cəzalanmalıdır”, — deyə ikiqat paralimipiya çempionu vurğulayıb.
Xatırladaq ki, Lozannada yerləşən İdman arbitraj məhkəməsi (CAS) beynəlxalq yarışlardan kənarlaşdırılmalarına görə, şikayət edən Rusiya Olimpiya Komitəsi və 67 yüngül atletin kollektiv iddiasını rədd edib.
Beləliklə, CAS Beynəlxalq Yüngül Atletika Federasiyaları Assosiasiyasının (IAAF) qərarını qüvvədə saxlayıb. Assosiasiya uzunluğa tullanma üzrə yarışan Darya Klişinadan başqa, bütün idmançıların Rio-de-Janeyro-2016 olimpiadasında iştirak üçün ərizələrini qəbul etməyib.
