BAKI, 22 noy — Sputnik. NATO-nın Şərqi Avropaya tərəf genişlənməsinə cavab olaraq rəsmi Moskva, Rusiya ilə quru əlaqəsi olmayan Kalininqrad vilayətinə "İskəndər" raketləri və S-400 raket əleyhinə müdafiə sistemləri yerləşdirəcəyini açıqlayıb. Sputnik xəbər verir ki, bu barədə rəsmi Kreml yazılı bəyanat verib.
Prezident Vladimir Putinin "NATO-nun bütün addımlarına eynilə cavab veriləcək" açıqlamasından sonra belə bir qərarın verilməsi diqqət çəkib.
Avropanın mərkəzində yerləşən və Rusiya ilə birbaşa qurudan əlaqəsi olmayan, lakin faktiki olaraq Rusiya torpağı sayılan Kalininqrada "İskəndər" və S400-lər yerləşdiriləcəyi xəbərini Federasiya Şurası Müdafiə və Təhlükəsizlik Komitəsinin sədri Viktor Ozerov açıqlayıb.
"ABŞ-ın təhdidlərinə cavab olaraq qərb bölgələrimizdəki hava hücumu və havadan müdafiə sistemlərimizi gücləndirməyə məcbur qaldıq", — deyə Ozerov qeyd edib.
