Musa Muradlı, Sputnik Azərbaycan
BAKI, 23 dekabr — Sputnik. Ölkəmizin hər yerində olduğu kimi, Bərdə rayonunda da bələdiyyə seçkiləri uğurla həyata keçirilib. Burada iki dairə seçki komissiyası təşkil olunub. 93 saylı Bərdə Dairə Seçki Komissiyası və 94 saylı Dairə Seçki Komissiyası 90000-dən artıq seçicini əhatə edir.
Sputnik Azərbaycan 93 saylı Bərdə şəhər Seçki Dairəsinin və 94 saylı Bərdə kənd Seçki dairələrini əhatə edən məntəqələrdə olaraq müşahidə aparıb. 5, 7, 8 saylı şəhər məntəqə seçki komissiyalarında seçici fəallığı ilə seçkinin gedişatını izləyib.
94 saylı Bərdə kənd seçki dairəsində də seçicilər səsvermədə fəal iştirak ediblər. 21 saylı kənd seçki komissiyasının sədri Maqsud Zeynalov seçkinin qanunun tələblərinə uyğun olaraq aparıldığını, seçicilərin də böyük əhəmiyyətə malik bələdiyyə seçkisində fəallıqla iştirakını vurğulayıb.
94 saylı Bərdə kənd Dairə Seçki Komissiyasının sədri Namiq Quliyev Azərbaycanın ən yaşlı seçicisi olan Səmərqə Allahverdiyevin ağır yataq xəstəsi olduğundan seçkidə səsvermə hüququndan istifadə edə bilmədiyini bildirib.
