BAKI, 1 yanvar - Sputnik. BMT-nin Uşaq Fondu (UNİCEF) 2021-ci ildə dünya üzrə uşaq doğumuna dair proqnozunu açıqlayıb.
Sputnik Azərbaycan RİA Novosti-yə istinadla xəbər verir ki, 1 yanvar 2021-ci ildə dünyaya gələn uşaqların orta ömürü 84 il olacaq.
Beləliklə, 2021-ci ildə dünyaya gələn uşaqlar 22-ci əsrdə də yaşayacaq.
Bu il dünyada ilk körpə Sakit okeandakı Fici adasında dünyaya göz açıb. 2021-ci ilin ilk günündə 371 min uşağın dünyaya gəlməsi gözlənilir. Onların yarıdan çoxu Hindistan, Çin, Pakistan, İndoneziya, Efiopiya, ABŞ, Misir, Banqladeş və Konqo Demokratik Respublikasında anadan olacaq.
Analitiklər 2021-ci ildə ümumilikdə 140 milyon uşağın dünyaya göz açacağını proqnozlaşdırırlar.
